dr Altwiibersummer isch super:
Üse diesjährig Prachtssummer schliicht sich am Ändspurt entgäge...
Schön het är sich präsentiert - schön heiss - i würd sogar eher säge:
Brätschhagu heiss - ou wenn ig nid rächt weiss, wieso mir Bärner
"brätschhagu heiss" säge - isch de Hagu nid eigetlich us iis gmacht?
- Isch ds iis im Drink gmeint? oder ds iis, womä bruucht, fürne Glace härstelle? - ITEM
No hei mir ä länge Altwiibersummer vor üs - Ig mane guet - laui Tempärature
ä Jahreszyt wo zu Tatedrang aaregt - u Tatedrang hani gnueg:
u Tatedrang bruuchi ou: i ha i dä kommende Mönet einiges vor:
Zersch wotti aber allne, wo mir Folge und miner Videos gärn luege danke - dank euch isch dr Startschuss vo
minere Bärner Troubadour Tätigkeitsuswytig uf TikTok und Insta erfolgriich glunge!
I bi säuber gspannt wienä Pfileboge, ob miner wytere Plän ou glinge...
Folget mir wyterhin und bsuechit ab und zue KRACHIMTRAM.CH - damit dir
keh Aakündigung vo öbbis neuem nie nid verpassit.
CDs Standbei und Kasifuetter chasch uf so ziemlich
allne Streaming - Plattforme lose:
Güggu, Bärner Troubadour
=> wed ds Publikum stimmt, machts allne Spass... <=
Kurzdokumentarfilm vom Maurice Busch
Mit sim Erschtling het dr Maurice Busch än ussagechräftäge Doku gschaffet, wo grossi Wälle schlaht.
Vieli Hingergründ us mim Läbe wärde iidrücklich festghalte und dürlüüchtet. I gratuliäre ihm für das glungne Wärk.
Dä Giel het Pfupf im Füdlä!
U ging gäng nid ds lang studiere, sondern gad sofort Beidi Kanäl abonnemiere u Düüme ufe!
krachimtram = Krach im Tram ? => entscheid sälber
Aus Troubadour ghören i anere zwar chliine, aber eher symphatische Bruefsgattig aa.
Mit chley Humor isch o dr Websyte Titel ds verstah:
Gwüss gits ä Minderheit, wo mini Ungerhaltig als "KRACH" betitlet...
Vor überwiägende Mehrheit wird mis Schaffe zum Glück nid nur toleriert. ..
Mi freuts, dass vieli mini Ungerhaltig schätzte oder sogar als wichtig empfinde.
Eehmm... Wiä heisst jetzt scho wyder: ...Krach... im ... ö.V..? ... im Bus...? uf dr Pläfä...? ...Oder öbbe ... Krach unger dä Loubene...?
... aah jaah, jetz weiss is wyder: krachimtram, KRACHIMTRAM, K R A C H I M T R A M...!
... und unbewusst chasch dir nachem Nachegrüble dr Websyte Titel besser iipräge... Claro?
Dr Güggu:
- ä wöschächte Bärner
- ä Troubadour
- ä Liedermacher
- bimäne Haar äs scho fasch legendärs Stadtoriginal...
Sit fasch drü Jahrzähnt gibi für all miner Mitbärner alles...
Im Name vo minerä sälbsternannte, absolut inoffizielle Kommission für die hochoffizielli Churzwiligkeitsstimmigs Optimierig bieten i syt zwüschezytlech fasch 30 Jahr Ungerhaltig i dä Fahrzüüg vo dr BärnMobil aa. Teuf im Härz füehli mi beruefe all mine Mitbärner ä Teil biizstüüre für nä erläbnisriichi Heifahrt. As söll am Stimmigsbarometer schier dr Saft usem Kapillarglesli usetätsche.
Inspiriert vo vielne Mundartkünschtler, allne vora vom Mani Matter, hani mi dr Bärndüsche Sprach verschribe: D Sprach vo üsne Vorfahre söll mit all ihrne wunderschöne Usdrück läbendig blibe und im Alltag bestah. Mit verspielt gstaltete Liedertexte und eifache Melodiefüehrige sölle Lieder zum mitsinge iilade.
Ä Melodie im Ohr
Dr Firabe ghört eidütig zu dä schönschte Abschnitte vom Tag.
Mit änere Fahrt im Tram, im Bus oder im Zug starte die meischte Bärner dä viumals lang ersehnt wichtig Tagesabschnitt.
Seigs ufem Wäg is gmüetleche heimelige Stübli, ob Richtig Spunte zum gmeinsame Häbe u Schütte vomene Chüehle mit Fründe, oder wo haut ou immer dasses nachem Bügu äso häre geit zum ga umenang scharwänzle...
Ä öbbisem sölls gwüss nie mangle: Ä fröhlechi Melodie im Ohr. Dasch ds Tüpfli ufem i, das laht dr grau Alltag la Farb strahle...
Genau das isches, woni minere Zuehörerschaft gärn aabiete.
S isch geng schön ds gseh, we usemene müede Lätsch äs wohlgstimmts Grinse wird. Die Dankbarkeit wo das usstrahlt git mir ä chräftige Puuscht u dr nötig Schnuuf. Äs isch äs Gäh und äs Näh: keh Musig ohni Zuehörer!
A dere Stell möcht i mi zuteufscht bedankä bi:
- Allne ufmerksame Zuehörer...
- Allne, wo dr Wääg gäbnet hei...
- jedem Mundartischt, ajede hett mi mit sim Schaffe mitprägt...
Musig lose
VIEL VERGNÜEGE!!!
Youtube
Hiä ä chliine Usschnitt us mim Musiker Alltag. Eifach uf d Bildli drücke, de wirsch verlinkt... Viel Spass!
Fusunase Aska
Während änere Minütige Ändlosschloufe vom Fusunase Lied hets d Aska furchtbar pressant, ufem Beschte Wäg zum Youtube Star...
Strassenmusikant Güggu
Ds Atelier 101 het für Weggli TV ä Doku "bachet": näbscht ämene Bricht übere miner Tätigkeite isch hiä dr legendär Minnekläffer Uftritt vom Lothar verewigt...
Güggu - Bärner Musig im rote Tram
Jööh - isch d Aska äs härzigs Wälpli gsi... Drü Bärner Gymeler hei für ihri Facharbeit inere liebevolle Doku ä huufe Live Musig im ö.V drigschnitte...
Tik Tok
Bi TIKTOK fingt mä glägentlich di einti oder anderi amüsanti Sequenz...
Gluschtigs usem Gärtli...
schön ischer - schön läng dr Längebärg
